Шупашкар районӗнче 64 ҫулти хӗрарӑм ҫухалнӑ. Кун пирки «Лиза Алерт» шырав отрячӗн халӑх тетелӗнчи страницинче ҫу уйӑхӗн 19-мӗшӗнче хыпарланӑ.
Наталья Сергеевна Григорьева (Ершова) Шупашкар районӗнчи Чакасси ялӗнче пурӑннӑ. Вӑл ҫу уйӑхӗн 18-мӗшӗнче ҫухалнӑ.
Хӗрарӑм килтен тухса кайнӑ чухне хӗрлӗ курткӑпа, симӗс кофтӑпа, хура юбкӑпа тата хура сумкӑпа пулнӑ.
Ҫухалнӑ хӗрарӑм 164 сантиметр ҫӳллӗш, начаркка, куҫӗ хӑмӑр тӗслӗ.
Кӑҫалхи утӑ уйӑхӗн 1-2-мӗшӗсенче «Чӑваш халӑх еткерлӗхӗ» ятпа регионсем хушшинчи фестиваль иртӗ. Ӑна Чӑваш таврапӗлӳҫисен пӗрлӗхӗ йӗркелӗ.
Фестивале Чӑваш Енпе, чӑвашсен историйӗпе, этносӗпе тата культурипе паллаштарас тӗллевпе ирттереҫҫӗ. Фестиваль ӗҫӗ-хӗлӗн тӗп ҫул-йӗрӗсем ҫаксем: шкул таврапӗлӗвӗ, археологи таврапӗлӗвӗ, экологи таврапӗлӗвӗ, ҫарпа истори таврапӗлӗвӗ, туризм таврапӗлӗвӗ, литература таврапӗлӗвӗ, музыка таврапӗлӗвӗ. Унта 14-26 ҫулхи вӗренекенсемпе студентсене, ҫавӑн пекех вӗсен ертӳҫисене хутшӑнма сӗнеҫҫӗ.
Фестиваль «Чӑваш Керем» этнографи комплексӗнче иртӗ.
Чӑваш Енре тата тепӗр музей уҫнӑ. Халӑх инструменчӗсен музейӗ Шупашкар районӗнчи Кӑшавӑшра, унти «Ясна» этнокомплексра вырнаҫнӑ.
Музейра тӗрлӗ инструмент вырӑн тупнӑ, ҫав шутра 200 ҫула яхӑн маларах хатӗрленӗ кӗсле те пур.
Унти инструментсемпе ҫавсене ӑсталакан Даниил Даниловпа Николай Фомиряков темччен паллаштарма тата инструментсемпе каласа кӑтартма пултараҫҫӗ.
Чӑваш Енри 6 управляющи компание ӗҫлеме чарнӑ.
Республикӑн Патшалӑхӑн ҫурт-йӗр инспекцийӗ нумай хваттерлӗ ҫурт-йӗре тытса тӑракан ҫав организацисен лицензине тӑсса паман. Ӗҫлеме чарнисен списокне Шупашкарти «Хотэй», Шупашкарпа Ҫӗнӗ Шупашкарти «Люксжилсервис», Шупашкар районӗнчи Ишлейри «Новое село», Ҫӗмӗрлери «Коммунальник», Сӗнтӗрвӑрринчи «Центр» тата Красноармейскинчи «Коммунальщик» управляющи компанисем лекнӗ.
Вӗсем хӑйсен ӗҫне ҫӗртме уйӑхӗн 1-мӗшӗччен ҫеҫ тӑсайӗҫ.
Ӳлӗмрен хваттер хуҫисем е урӑх компание суйлӗҫ, е ҫурт-йӗр харпӑрлӑхҫисен юлташлӑхне йӗркелӗҫ.
Паян республикӑра вырӑнӑн-вырӑнӑн аслатиллӗ ҫумӑр ҫунӑ. Темиҫе районта пӑр ӳккеленнӗ.
15 сехет те 15 минутра Шупашкар районӗнчи Сарапакасси ялӗнче пӑр ҫунӑ. Кайран "Про Город" хаҫата Карачура патӗнче те пӑр ӳкни пирки пӗлтернӗ. Тепӗртакран пӑр пӗлӗчӗсем Шупашкарти кӑнтӑр-хӗвеланӑҫ районне ҫитнӗ.
Шупашкар районӗнчи арҫын ачисемшӗн алимент тӳлемен. Халь унӑн куншӑн ҫур ҫул патшалӑха ӗҫлесе татма тивӗ. Унӑн шалӑвӗн 5 процентне патшалӑх валли тытса юлӗҫ. Ҫапла йышӑннӑ суд.
Арҫын икӗ ачишӗн алимент тӳлесе пыманнипе малтан административлӑ майпа явап тытнӑ. Кайран та вӑл тӳрӗ ҫул ҫине тӑман. Ҫапла унӑн алимент парӑмӗ 1,3 миллион тенкӗ пухӑннӑ.
Николай Шупуҫҫыннин ячӗ чӑваш культуринче тарӑн йӗр хӑварнӑ. Ӑна чӑваш литературин никӗсне хывакансенчен пӗри тесен те йӑнӑш мар пуль ӗнтӗ. Чӑваш халӑхӗшӗн ҫӗнӗ тапхӑр пуҫланнӑ май литературӑна та аталантармалла пулнӑ. Чӑвашсен литератури пачах та пулман теме май ҫук ӗнтӗ, анчах вӑл темле пуян пулнӑ пулин те, ытларах енӗпе халӑх пултарулӑхӗ ҫинче никӗсленнӗскер пулнӑ. Юмахсем, юрӑсем, тата ытти енлӗ пултарулӑх. Шӑп та ҫав вӑхӑтри ҫынсем чӑваш литературин никӗсне хывнӑ та ӗнтӗ. Малтанах вӑл юмахсемпе халапсем ҫине таяннӑ, каярах вара хӑй тӗллӗн вӑй илнӗ. Анчах Николай Шупуҫынни, Константин Иванов тата ыттисем шӑп та шай литературӑн пуҫламӑшне амалантарнӑ.
Паянхи кун чылай чухне «чӑвашӑн вӑл ҫук, ку ҫук» теме юратаҫҫӗ. Анчах ҫапла сӑмахланӑ хыҫҫӑн малалли ӗҫе тӑвакансем ҫук. Ҫук япалана пур тума мехел ҫитермелле. Константин Иванов, Николай Шупуҫҫынни тата вӑл вӑхӑтри ытти ҫыравҫӑ-сӑвӑҫ шӑп та лӑп ҫук япалана пур тума пултарнӑ та ӗнтӗ. Чӑваш халӑхӗн поэмӑсем пулман-тӑк — вӗсем ӑна хайланӑ.
Ӗнер Шупашкар районӗнчи Самуккасси ялӗнче пурӑнакансем анкартинчи типӗ курӑка ҫунтарнӑ. Анчах ку пысӑк инкекпе вӗҫленнӗ. Ялта тӳрех виҫӗ пӳрт ҫунса кайнӑ.
Ку 14 сехетре пулнӑ. Ҫулӑм типӗ курӑк ҫинчен хуралтӑ таврашӗсем ҫине куҫнӑ. Ҫапла виҫӗ хуҫалӑх пӳрчӗ-качки шар курнӑ. Виҫӗ ҫуртӗнче те ҫынсем пурӑннӑ. Юрать-ха, хуҫисем чӗрӗ-сывах.
Шупашкар районӗнчи пӗр ял тӑрӑхӗн пуҫлӑхӗ ӗҫ машинипе харпӑр хӑйӗн тӗллевӗпе усӑ курнӑ. Ҫакна прокуратура тӗрӗслев ирттерсен тупса палӑртнӑ.
Йӗркене пӑснӑ пуҫлӑх тӗлӗшпе административлӑ ӗҫ пуҫарнӑ. Ӑна штраф тӳлеттернӗ. Сӑмах май, куншӑн нумайран та 500 пин тенкӗх штраф хураҫҫӗ. Текех унашкалли ан пултӑр тесе Шупашкар район администрацийӗн пуҫлӑхӗ тӗлӗшпе те представлени ҫырнӑ.
Чӑваш Енӗн Наци вулавӑшӗнче «Гаврил Федоров. Несӗлсен сасси» ятпа халӑх вокалӗн ӑсталӑх сехечӗ иртнӗ. Ӑна халӑх юрӑҫи тата чӑваш фольклорне пухнӑ Гаврил Фёдоров ҫуралнӑранпа кӑҫалхи пуш уйӑхӗн 29-мӗшӗнче 145 ҫул ҫитнине халалланӑ.
Ӑсталӑх класне Шупашкар районӗнчи «Телей» фольклор ансамблӗн ертӳҫи, халӑх юррин ӑсти, педагог, фольклорист Наталия Арсентьева ирттернӗ.
Пултарулӑх лабораторине (мероприяти пирки хыпарланинче ҫавӑн пек каланӑ) культурӑпа кану учрежденийӗсенче ӗҫлекенсем, «Телей» тата «Эткер» (ку коллектив вулавӑш ҫумӗнче ӗҫлет, унӑн ертӳҫи Земфира Яковлева) ансамбльсен солисчӗсем пухӑннӑ.
-1.7 °C